Gurean kultur kontsumoari buruz egin diren azken azterlanek argi erakutsi dute kultura erderetan kontsumitzen dugula batez ere;  euskarazko kultur kontsumoa oso baxua dela. Euskal Herri osoan gertatzen da hori, baita udalerri euskaldunetan ere. Kontsumo ohiturek eragina izango dute horretan; baina eskaini ezean, ezin da hartu. Zinema Euskaraz programaren bidez, ikus-entzunezkoak euskaraz ikusteko aukera izatea bermatu nahi dugu udalerri euskaldunetan.

Administrazioen ardura da euskarazko ikus-entzunezkoen ekoizpena sustatzea, eta baita pantailetan euskarazko edukiak bermatzea ere. Oso anitza da programazio honetan aurkituko duzuna:

Telebistako serieen estreinaldiak, dokumentalak, animaziozko pelikulak; film zaharrak, berriak… Ikus-entzunezkoak zinema aretoetan euskaraz gozatzeko katalogoa duzu hau, aisialdia euskaraz bizitzeko katalogoa.

UEMAren helburu nagusietako bat udalerri euskaldunetan euskaraz bizitzeko aukerak bermatzea da. Zinuema ekimeneko eskaintzarekin beste urrats txiki bat egin nahi dugu helburu horri segika. Bide luzea dugu aurretik, eta udalerri euskaldunetako herritarrok bidelagun zarete; kultura euskaraz sortzeko, euskaraz kontsumitzeko eta administrazioei euskaraz programatzeko eskatzeko bidelagun.